1. Mabiaki Khawlhring: Dt.1.11.2012 hi ka tan hriat reng tlak a ni tlat. A chhan chu maw, ka zak ve det! Ka office kal tur ka inuluk ve khawp mai. High Heel nen coat nen ka inchei ve thlap (Incheina sawi tel hmasak a ngai!). Chuan Office banah chuan bazar lamah puanthan lei tumin intinalh ve thawkhat tak chuan ka chhuak phei ta a; Scooty hi Dawrpui Biakin bulah ka dah a, bazar lam pan chuan ka chhuk ta a. Ka thil lei duh ka lei zo chu Zion Street ngei maiah chuan ka chho, step awm ka pel fel hman chiah tihah chuan ka pheikhawk bun lai chu a ni deuh huih mai a, ka han en chian chuan ka pheikhawk vei lam heel ngei mai chu a lo thlawn fel der mai a, ka hmuh mai loh vang chuan kan hawi let a, a lo lumthla chu niin! Tlangval fel tak hian min lo dansak a, ka zuk la ta a, bun sang ve ang reng si. Ding lam san hisapin, san lam inang thei ang ber chuan ka’n dingdihlip chho ta a nih kha. Lei ka zuk rah zeuh chuan perek pali a lo lawr fur mai bawk si, ka ke artui a na zawk zel si! Ka scooty awmna chu ka han thleng hram a, pheikhawk bun lova inkhalh haw dawn chuan traffic jam-ah intlawhkhalh ngai dawn bawk si. Ke phuhlip uara In thlen ai chuan tiin bun chung chuan ka inkhalh haw ta hram a. In thlen hma chu zak ngat ngat ni deuh ber e.

2. Lapuii Chawngthu: Ka thiannu pakhat pawh Sunday tlai khat ka’n leng chu veng dang tlangval 4 vel kalte hnungah inla tawkin a zai/lam su thla alh alh a, lungte a rap hrual a, a’n tlu ta mai a le. Kawrfual kan la ha sia, a kawr a lip chhoh vek bakah tlangval pakhat ke-ah tak chuan a zu tlawh a, an inthut awlh mai chuh! Kan tlanchhiatsan nasa teh e. Hemi tum ni lo a chetchhiat pawh ka’n sawi nghal law law ang e. Chhas a neih ve hmasak ber hian an lo indap ril ve deuh nge mawni, a bialpa chuan thiannu bra atangin cheng 2 note zawr tawk hi a phawrh ta nawlh a, thiannu zak lutuk tihngaihna hre lo chuan, “A… Ka tã pawh a ni lo, i chawh, i duh leh nei daih rawh,” a’n ti ngawt pek a!

3. Maremi Hauzel: Hmanni khan damdawiinah kan awm a, kan bul chiah khuma pitar hi ventilator nena enkawl hrep hnua zaipui tawk leh a ni a. Amah hi a vai ruai a, khap loh chuan a tawng nileng zankhua mai thin a. Kar khat vel a inthiar tawh lo ei tui ve tawh bawk si chu a pum a puar ve ta. Zan khat cu ka kawm ve malh malh a, a khum bula keimahni thutthlengah ka thu thla a. A hnu deuhah a vawih a niang, “A uih lutuk, i vawih uih..i vawih uih.. I vawih uih.. I ê hial ami? I ê hial ami?” a’n ti char char mai chuh, ngaihdam har hi ka la ti khawp mai!

4. Mathari Khiangte: Naupan lai sawi ila. Middle kal lai, class-V kal lai niin ka hria, ka chiang chiah lo. Han infak lawk ila, mahni tawkah ka inthazo ve a, sikul sport kan nei a. Thianteho inkhelh lai chuan field thlang lei vûngah ka lo tawlh a, ka tawlh thla par par a, ka tlan chho leh par par a. Chutiang chuan ka awm ka awm a, kan sir hian min lo thlir reng a, intihtheih nan ka hmang a, ka tawlh char char a, min entu an tam tial tial a, nuam ka ti tawlh tawlh a. Tlan lawn leh piat a, chuan ka awmna thlang ka zuk thlir a, kawng hi a awm a, kan sikul naupang dang pawh hi an lo awm a. Ka thiannu ka sawm a, zuk kal ve ang ka tia, a peih loh vangin keimah chauhvin ka zuk kal a, ka thleng fel reilote-ah, “Thari a â,” tiin inkhelh thulh vek khawpin an lo tlan thla hum hum mai a. Ka tihngaihna hre lo chu ka tap ringawt a, kan sir pakhat hian min rawn hruai chhuak ringawt a, ani ka lei vung tawlh kha infit min lo ti lutuk tak tak kha a lo nia, ramhuai hnathawh bak a ni lo vang an lo tia, chutah ramhnuaiah ka la kal ta deuh deuh nen, mi â ramhuai hnathawh a niang an lo ti daih mawle. (He post hi vawi 673 keu hawn a ni tawh e.)

1. Lalhminga Hmar:

Nikum hmasa kum tawp lam khan ka thianpa nen nula kan rim a, sikri kan aia. Ka st*r nu leh pa nen 5 kan nia, ka tawng tui ve khawp mai a. Ka khup ding lamah ka kut ka suih a, tawng zet zet pah chuan ka ke ding lam chu ka then lauh lauh a, ka che hit viauin ka hre tan. Chutah le, ka kutsuih chu a pelh thut a, sikri chu ka pet darh ta vek mai! Kan darh huk, carpet a kang ta mai, kut durh phungin meihawl ling ka chhar chiam kha!

2. Ruata Giroud Ngente:

Class 10 ka nih laiin kan exam zo ka haw kha chhun pachang a ni bawk a, bus kha a thawl em em a. Ka bus chuannaah khan mi 5 vel chiah an chuang a, bus a tlan tep tawh tihah school naupang tho, hmeichhe panga hi an rawn lut ve a, ka bul chiahah pakhat a rawn thu a, ka hnungah 2, ka hmaah 2 an thu bawk a. An titinaah khan min telh ve nghal bawrh bawrh hi a ni deuh ber mai. Zawhna te kha min zawt chhen bawk nen, ka ning lutuk kha bus stand hmasaber (Zodin) a thlen velah ka ding hluai a, ka intauh nghal chawrh a! Thinrim ve tawh laklawh si, na ti bawk si, na ti lo hmel put tum bawk si, an lo nui tet tet tawh bawk si, rang zetin ka chhuak a, bus hnungah ka ding a, ka lu ka tuai nghal vawng vawng. Na bawk zahthlak bawk hi ni ringawt.

3. Ma-i Pachuau:

Hmanni ka chetchhiatna: Dawr kal turin lukhum leh mawza hi ka bag-ah ka khung a, dawr thlen hnu chuan lukhum chu ka khum a, mahse, mawza chu ka hmu ta reng reng lo mai a. Ka thlauh a nih ka ring a, in ka thlen hnua lukhum ka’n phelh chuan ka lo khum hnan reng…haha.

4. Brandon HT Hrahsel:

Hman zan mitthi ina kan tlaivarnaah ka phone ka jacket iptea ka ah kha phawrh ka tum a, ka han phawrh chiah mai chu, ka phone a lo ni awkawng lo mai a, kan TV remote a lo nia! Ka bula thute’n min hmuh hman hlauvin ka ak leh rang teh asin aw… Zankhuaa mitthi ina TV remote ah chu hmanna tur a vang duh khawp mai.

(He post hi vawi 397 keu hawn a ni tawh e.)

-Thanpuia Khawlhring Lungen

Kum 200* June thla ni tain ka hria, ka zinnaah nula (ka thiannu ni sa ve hrim hrim) hi ka thianpa nen kan rim alawm. Fur ruahtui tam lai a ni a, nihliap kan keng si lo. Ruahin min dang ta char char a. Dar 11-velah pawh kan la bengchhengin kan la ri lang lang mai. Keini thiandun thawveng leh fiamthu duh bakah rawlring chi lo ni ve bawk nen, kan thawm a tha khawp mai.

Zan dar 10 velah pawh kan thiannu pu chu zung tur te, varandah-a awm turte hian kan awmna chu a rawn tei tlang leh fua zel. Hmel hlim a pu tawh mawlh lo. Mahse keini thiandun khan eng ngee a awmzia kan man pha reng reng lo.

Tichuan, a khât mawi tawkin rum takin a rawn tei kual leh thin. Keini kan tawng ngaiin kan la ri phar phar zel bawk.

Le, dar 12 a ri dawn ta, a pu chu a rawn tei ta meuh lo. Keini kan bengchheng tial tial. Ngai teh, vawi leh khatah room atangin patling zahmawh thankin uai tawh, aw têng tak mai ri hian, “Haw rawh u!” a rawn ti mai chu! Ruahsur bur bur karah pawh kha aw kha kan va hre chiang tehlul em! ‘Ngawi rawh u’ tih kan ngai lo, ngawi rengin, pen pawh pen ri tha ngam lovin kan pen chhuak a, phur lo deuhvin ruah kan do ta.

Kan nula rim nen khan kan inmangtha ta em ka hre lo. Hei erawh ka hria, vawi khat mah ka leng nawn leh tawh lo. Tun thleng hian ka bengah ‘HAW RAWH U’ tih ri kha a la cham thei nia… (He post hi vawi 518 keu hawn a ni tawh e.)

-Snoopy Rfn

Tuk dang ang bawkin zing ni chhuah rual vel chuan ka tho leh a, ka kâwng bawr velah chuan eng maw ni, thîp deuh tãk hi a lo awm a. Darthlalanga ka’n en chian chuan ‘khawihli’ a lo ni a.

Kar tam liam hma chuan a lian tawlh tawlh a, nat pawh a na sawt hle mai. Tuar deuh rih a la ngai dawn a nih hi. A hnai a rawn hun chho ve tep tawh a, a inthlahrung lo chho telh telh a, a nat hian a na em em tawh a. Ka lungphu nen a inthlung kawp emaw tih mai turin an phu rual ut ut ta mai a.

Chutia a nat tak em avang chuan ka hlauh tlawn zawk hial a, ka duat ta em em a. Kawr hakin a hrût palh ang tih te thleng chuan ka ngaihtuahin ka veng ru reng thin.

Tuk khat chu, zing nilum aiin, thu tung pahin lei hi ka thai kual vel mai mai a. Chutah tak chuan alawm ka theihghilh tawh mai mai loh tur! Khawi lam atanga lo kal nge mawni, arpuiin ka khawihli duatah tak chuan a rawn chuk ta a nih chu…Huhuuuu..a natzia mai chuh! Ka thal tawp! (He post hi vawi 695 keu hawn a ni tawh e.)

Ka’n inpuang ve reng reng teh ang. Kum 2010 kha ni tain ka hria. Ka thianpa K. Zoramthanga Hmar (comedian) hi HSA Conference-ah fiamthu thawh turin an sawm a. Conference hi Reiek-a neih tur a ni a. Thiante tiin amah tawiawm turin min sawm a. A u leh nau hmeichhia ve ve leh kan thiannu pakhat nen kal kan tum a.

Bus chu Chanmari kawn atanga chhuak tur a ni a. Chanmari kawn chhak lawka City Bus lo dingah chuan kan lut rãwih a. Kan kal ta a. Kan tlan lai chuan a hnungah kan thu a, fiamthu te kan thawh a, kan nui ham ham a. Midang chuan min en hrêk hrêk a.

Tichuan, kan tlan kan tlan a, Sihhmui kan thleng ta mai. Picnic spot (a hming ka hre lo) pakhatah kan chhuk a, keini’n buhfai, sa leh thil dang dang kan thiarthla a, kan nula hruaite chu pipu-ah te an lo uai vel a.

Nakinah chuan keini programme kha Reiek a ni si, kan ngaih a tha lo tan. Keini Reiek la kal ngai lo hlang kan nia, a kalkawngah chawl mai mai ni turah kan lo indah a. Nakinah chuan midangho kha swimming pool-ah te an zuanthlak tak sup supah chuan thil awmzia kan zawt a. KTP Chanmari Branch picnic tur an lo ni reng a!

Kan zak lutuk! Engmah sawi lovin, zak lo awm ang deuhin kan awm a, kan tawi hret hret a, kan haw daih! Kein tawite kan kal a, kan nulate zak lutuk chu an tap lek lek a! A tawpah chuan vawkchaw phur motor kan hmu a, kan phar ding a, nalh deuhin vawkchaw phur motor a hnungah kan chuang haw daih!

Tun thlengin kan la sawi kan la sawi mai. Ka la zak ru chem chem thin. Kalkawngah te khan fiamthu kan thawh ham ham te kha a ni sia, ngaihtuah thui poh leh kan zak zual zel a ni hawt mai. (He post hi vawi 210 keu hawn a ni tawh e.)

1. Jen Puipuii Jahau:
Ka tawng sual ve thei hrim hrim a. Zaithiam ti ila hmanah chuan a lar ve deuh thin a, ka u bialpa hi a lo leng a, demand channel awm tirh lai vel kha a nia. Pakhat kha an rawn thlang chhen mai a, ka ning deuh khan ka u bialpa bulah, “Khi nu lah khi zai thiam lo si, a hmelchhe bawk si, an thlang renga ka ning,” kha ka ti ta hrep mai a. Ani lah kha engmah sawi lo lem lovin a nui mai a. Keia lah pek chu hmet sawn mai lo chuan a chezia vel kha ka sawisel char char a, “A zei lo si, van thing tak! A zai dan te chu a tenawm, a chhungte paw’n an zaitir ngam zawk, an zahpui lo nge mawni le!” kha ka ti ta hlawih hlawih mai a. Ka u bialpa chuan ka hnung atang chuan, “Nia, ka nute paw’n zai tawh suh an tia, a tui ve sia, a ti lui tlat a…” a’n ti mai chuh! Hnar aw lian lian a ni ringawt!

2. Kruz Xogte:
Zan khat ka rui chu ka haw theih loh ringin ka thianpa chuan anmahni inah mi hruai haw a, “Riak nghal mai rawh,” min ti a, ka hnial hran lo. Tichuan, a room-ah kan awm a, computer games kan khelh lai chuan ka zun chhuak chu bathroom-a zun tumin kawngkhar ka hawng a, en chiang mang lovin (bakah keimah ka chiang lo hrim) kawngka ­atang chuan kan zung ta ringawt a. Ka tichik kual vel a. Ka thianpain mi lo hmu chu, “Ngati nge khatah khan i zun?” a rawn tia, ka han en chiang chu an common room-ah ka lo zung reng chu niin. A pa leh a farnu kha room-ah chuan an lo awm reng a, min van hmu chiang em! Ka zak lutuk chu ka ruih zawng zawng a reh vekin ka hria, riak ta lo chuan ka haw nal nal. Hun rei tak chu chu an inah ka kal ngam lo, a farnu leh a pa lah chuan min hmuh apiangin min fiam ziah a, a farnu phei chuan, “Ka rin aiin i neilian!” te min tia, zahthlak tak a ni.

3. Lawma Eastout:
Ka thianpa thil tawn. ‘Hmanah Chanmari-ah ka thiante nen ganja kan zu vak mai a. Kan ruiin kan nui nasa mai a. Town Bus-ah kan veng panin ka haw ta a. Ka thutpuinu chuan mak tih hmel deuhvin mi rawn en leh thin a. Treasury Stand-a ka chhuk tur chu conductor chuan ka pawisa pek pawh en lovin mak tih hmel takin min thlir liam a. Kawnga ka chhuk pah chuan ka ngaihtha lo chu ka han indap chiang a. Ka hmui chung lam chu ka hahni-ah a lo bet chho vek mai chu lo niin! Thiante nena kan nui kha bus-ah khan nuih chhunzawmin tukverh bulah thu bawk si, thli khan ka hmui kha a chhem ro a lo ni! Ka zak lutuk ka hmui chu ka pawt thla chawt chawt a, ka kal nal nal e’ a tia lawm. (He post hi vawi 590 keu hawn a ni tawh e.)

-Zico Silva Kullai

Kan high school kal ve lai a nia. Inrinni sikul chawlh te a ni bawk a, ka thian hmeichhia pathum leh mipa pakhat hian lui kalpuiah min sawm a, ka hmelin a zir loh vang nge ka hmel hi a ram vak mi hmel zawk pawh ka hre chiah bik lo, ram vahpuia sawmtu hi ka nei thei riau a.

Hemi tum pawh hian ka lo star ruk ve deuh a tel dawn avangin ka phur ve hle a, kal dawn tak takah chuan ka thianpa chuan harsatna chhuanlamin min thulhsan a, kei leh ka thian hmeichhe pathum chu phur takin luidung lam pan chuan kan inzuithla hnak hnak a.

Lui kan thleng a, chakai khawrhin lui hnar lam chu kan zawh chho ta a. A hmasa berah ka ka kal a, chakai ka man dawn lai tak chuan ka thiannu ka lo sitar ve em em chu hlauh nei tih hriat mangkhengin a rak tuar tuar a. Ka tlanthla vat a, thil awmzia ka zawh chuan – hmmm…a point-ah tak mai hian vangvatin a lo luhkhung chu niin! A thian hmeichhe dang khan an laksak ngam bawk si lo, a mipa awm chhun kovah a tla ta!

Ka nuih a za, ani rak chul bawk si, “Lehlam hawi chungin la rawh, rawn hwi reng reng suh ang che,” a ti ta mai, lehlam hawi chungin ka va dap, a ni tur âwm bera ka rin chu ka’n phih thawt mai a. “A nâ…!” tih leh ka beng kiu vawng vawnga ben a rual ta mai! Karei karei! A ni lo zawk ka lo man chu niin, ka zak bawk si, ramhnuaiah ka tlanlut a, pum na vekin ka nui. A pasal neih hnu thlenga ka hmuh hian ka nui lo thei lo, a la sen tân tân zel.

Ka van man sual chiang tak! (He post hi vawi 343 keu hawn a ni tawh e.)

-Mami Apuii Chawngthu

Vawi khat chu ka cousin nen zirtawpni tlaiah ka pain, “Bazarpuiah chawhmeh va lei rawh u,” a tia, ka putea scooter LML Vespa, rangkachak rawng ngei mai, hlui tawh tak chu kan hawl chhuak a. Ka pawnfen kha puan nal chi a nia, fenhnuai a nal bawk sia, scooter ke rah chhan lah a tla bo daih tawh bawk si.

Kan inphur phei ta a, ka thu nghet thei reng reng lo mai a, ka tla lek lek reng a, ka u chuan bak deuh hian, “Invuan nghet ta che mawle,” min ti a, ka titau chuan ka vuan duh lawi lo va. Tuna Shanghai 99 dawr zawn saw a biboh sia, ka sawt thla ta mai a! Ka tlu lo va, ka tla ding awt mai a, mi thenkhat chu an lo tê thawt a; ka zak lutuk chu chhuk tum sa reng anga lan tum chuan, ka u pawh au lem lo chuan chawhmeh chu ka zu leisan ta daih a.

Ka bazar zo, Zion Street-a ka kal chho chu, ka u chu a rawn hawi thla vak vak a, chak tawka rawn chhuk chu ka lo nuih a, min hmu chiah chu min hnek dawn amaw ka ti hial, a hmel chu hmuhnawm lo tak a ni. “Ka zawng nasa lutuk che,” a ti a, casualty-ah te scooter atanga tla an dah leh dah loh te a lo han zawt a, mangangin a lo tlan kual hrep tawh a lo ni a. Ka thil lei chu a la lawk a, “I duh leh bus-ah haw rawh,” a tia, min kalsan nal nal mai a, engmah ka sawi ngam tawh si lo va, a hnung lam atang chuan ka chiatkhum nasa teh asin. (He post hi vawi 892 keu hawn a ni tawh e.)

-Manuni Vangchhi Manuni

Hman kumah kan kohhran-in camp kan nei a. Pu VL Nithanga team-te kha kan ruai a, a lar vanglai kha a ni bawk a., a nuam khawp mai. Kohhran-ah tuiin a kul a taiah tang mah ila, ka lam ngai lo va. Zai hi chu ka peih khawp mai. Lam kher hi chu ka talent a ni lo ka ti thin a, ka thiante lamruiho hi ka buaipui mai thin.

Loh thei lohvin rawngbawltu camp-ah ka lut ve ta a. Hmeichheho hi kan kal hrang thin a, an team zingah khan pa pakhat hi mi a khawih chuan taksa chetna an chang mai thin a. Kan tawngtai rual a, taksa chetna an chang ta sup sup mai; kei leh nu pakhat hian kan chang ve thei si lo va, chu pa chuan min ngaimawh deuh a niang chu, a lo kal a, vawi nga vel min her kual a, min thlah mai chu! Taksa chetna chan chu khawi lam, ka lu hai lutuk chu chhuat laiah ka tlu tawp a, ka luak bawk a. Min buaipui nasa teh asin.

Tichuan, camp chhuah dawn zanah biakin chhungah kan zai khawm a. Lam turin min tur chhuak ve ta. Zak chung chungin hawi chhuak ngam lovin ka lam kual ve ta a. Lam kan tam bawk si, chutih lai tak chuan petromax, a êng a that loh avangin an lathla a, a hrui an pawt chho leh tur a thir kawmin ka sam tawn a bat fuh ta! Ka dak lawp a, ka kal thei tawh si lo, hnunga mite lam ka tibuai zo vek a! Nui lo pawh hi kan awm lo, ka zak lutuk hi lam nawn chu khawi lam, ka sam a pawh chhohna ka lu lah chu a na thum leh nghal. Ka ngaihtuah let hian ka nuih a za thin. (He post hi vawi 220 keu hawn a ni tawh e.)

1. Lianthanga Lta Hauhnar
Kan khuaah hian ka awm tam vak lo va, tum khat zan inkhawmnaah hian thawhlawm an rawn khawn a, ka awmna lama kan inkhawmnaa kan tih thin dan angin ka zawnan rawn khawn thlen chuan thawhlawm ip chu laka ka piaha mite pek chhawn zel chu ka tum ve mai a. Mahse, an lo ti ve ngai lo chu niin! Kei lahin hrethiam nghal mai hek lo, thawhlawm ip inchuhin thawhlawm khawntu nen kan han inpawt tak tak a nih kha! Mite chuan min en thap si a, ka zak lutuk inkhawm chhung zawng ka hawi chhuak ngam tawh lo!

2. Ivy Chhakchhuak Freza
Middle School kal lai khan rawlthar kan class-a miin ka thiante nen infiamin min ùm a. Nuam ti ve tak chuan ka tlan ve hãw hãw a. Ka hriat chhuah meuh chuan ka pawnfen a lo tla daih chu niin! Underpant nen engtia rei nge ka tlankual tawh pawh ka hre lo. Zah pawh ka zak ngam lo, sir hnenah, “Ka pum a nâ,” ka tia, ka haw vang vang.

3. Tetea Jongte
Synod school-a kan kal laiin che che ve tak chu ka ni. Sikul tlanbo kan chîng hrim hrim a, sikul compound pawn chu a sang hlawm sia, kan zuangthla mai thin a. Vawi khat chu home work kan thiam si lo, tlanbo kan tum alawm! Kan chhuak a, kan zuangthla ta le. Ka tum chiah ka’n hawi chhuak chiah chu, principal leh staff-ho compound endik lo kal kual vel an hmaah tak ka lo tum chu niin! Ka nui ringawt a, kar khat nitin ka thingthi tluan zak.

4. MalSz Mally Chhangte
Hmanni deuh khan pheikhawk sang ka lei a, a thar lawmin chawlhni hmasa berin kan bun nghal a, awi karei! Ka zahzia mai chuh! Mi awm lai thep thawpin ka inpal a, ka pheikhawk lei thar a’n chhe nghal mai nih kha. A chung leh a hnuai a inthen phak mai a nih chu. Engmah sawi tawh lovin ka haw nal nal.

5. Rla Go Penglengpunga
Zan khat nula ka rimnaah ka kua a’n tha lo mai chu hit lo e… An bathroom kha inchhungah a awm si, ka’n e mai chu a ri pherh pherh mai bawk sia, chhuah a huphurhawm teh e. An hre phak vek awm sia, mitthlaah mahni bathroom a lang uarh uarh mai lawm. (He post hi vawi 878 keu hawn a ni tawh e.)

1. Jenny Chawngthu
Hman zanah kan thenawm dawrah thil lei tura ka kal chu Junior Comedian Search kha an chhungkuain an lo en thap a, kei paeh chu reilote ka’n en ve lawk, tih pahin ka thu ve mai a. Kan nuih nasat lai takin ka phone a lo ri a, ngaihsak vak mang lovin ka pick a, ka thianpa pakhatin, “Hei ka pa a boral a, tlaivarpui a ngai dawn a,” a rawn tia, kei lah TV en ringawt ka lo ngaihtuah bawk nen, ka ngawih vung vung hnuah ‘Hello’ a rawn ti leh kha phut zawk pahin, “Tunah a la thi mi? Thi mek maw?” ka’n ti ngawt mai ah! “Eng a?” a rawn ti let leh a, tawng mai tur ka hre tawh si lo, “An la phum lo maw?” ka ti leh ringawt a. Kan thenawmpa chuan mi lo kheuh zauh a, ka harh chhuak zawk chu ka zak lutuk ka nuihza bawk si a rukin ka nui char char tawh mai a. Ka tawngthei lo thenawmte chhung mi nuihzat lutuk lah chu room lamah an tlan vrk ringawt a, Ka thianpa chuan zawi raihin, “Nakinah kan buai loh hunah ka rawn hrilh tha leh ang che,” a tia, phone a dah daih a, ka call leh pawh a pick tawh miah lo, amah lah chuan mi rawn be tawh reng reng lo. Ka va han zak uchuak tak emmm!

2. Lh Gunners
Kan hnatlang mup mup a, biakin hnuai slap kan chhung a, tosola chawi paha mawng suzi kha kan chîng laklawh a, kan hlim phian mai. Thingpui in chawlh kan nei a, kan thu thap mai a. Ka thianpain ka cellphone a ah avangin, “Khawnge a awm?” tiin ka melh kual a, ka hmu mai si lo, biakinpui step bulah chuan kekawr dum ha bungbu tauh mai mawng suzi rem tawk a lo awm. Hma lamah a hmawlh ken chuan lei chu a thai bial pap a, a kawng achin chung lam zawng hmuh theih si hek lo, ka thianpa ni ngeiin ka hria a, zawi tein ka chho den den a, “Khawnge ka phone?” tih pahin a mawngah ka’n suzi pawp mai chuh! A per dawrh mai a. Ka dak chhuak chiah chu kan kohhrana ka zah ber mai kan upa a lo ni si, a thnrim a mawng na ti bawk si insum chu a sen nghal tawn tawn mai a, “Ka thianpa emaw ka ti che a,” ka ti vat chung pawh chuan a na a ni tih hriat tak hian kal sawn pahin, “Chîng tawh ngai suh ang che!” a’n ti mai chuh, a van han zahthlak ber mai.

3. Hmingchhuanmawia Fanai
Ka bialnu nu hi a strick khawp mai a, an inah pawh ka leng lut ngam meuh lo, zan khat pawh ka bialnu chu ka phone lawk a, zan danga ka lo nghahna thin an in bul theihai buk hnuaiah chuan ka lo awm a. Ka awm atanga rei vak lovah chuan kawngka inhawng ri ka hria a, pawna lo chhuak ka hmuh veleh thimtham zingah chuan ka pan hnai a, ka kuah nghal mai a, mahse, ka bialnu a lo ni ikhaw lo mai! A nu zawk chu lo niin, a ṭê nasa mai, kan hre chiah chu ngaihdam ka dil nghal char char, tlema tlemah jail bang ka zut ṭep a ni.

4. Matlanì Ralte
Ka thianpa (bialpa) a lo leng a, kan inkawm ngeihin kan innel tawh hrim hrim a, zak dek ka tih theih loh em avang hian min dek lui vak vak zel a. Chumi tumah pawh chuan mi a dek leh a, ka phu zawk a. Ka au tuarh a, chumi rual chuan ka’n vawih pah tuarh mai a nih kha. Ka period kawpuar lai lo ni bawk nen, ani pawh a hrilhhai ngei mai; a tawp chat a, min kuat bet tlat ta teh ngawt a nih kha. Ka zah a hlauh vang nge niang ka hre lo le. Tawng pawh ka tawng lo, ka zak ngawih ngawih. Chuta tang chuan min dek leh tawh ngai lo reng reng. (He post hi vawi 3503 keu hawn a ni tawh e.)

1. Mpa Ralte Kawlni
Tum khat chu ka zurui kan thiannute inah ka leng a. Ka bem chiam mai a. Min ning lutuk kha awmngaihna pawh a hre lo ni berin ka hria. Kei lah cuan ka nawr tut tut mai a. “Nula i nia, kei tlangval ka nia, inngaizawng ang,” tih ringawt mai khan ka tia. A tawpah a ning lutuk kha an thenawmte inah a tlanchhe phei, keiin ka um zui bawk! A tukah min han hau tak tak mai chu sawi tur a vang duh khawp mai.

2. Nunhlima Ralte
Tum khat chu class-X kan zir laiin kan chhunchawlh (lunch break) zawh class kan tan leh dawn hian kawngkaah lo uai tangin kan hmeichheho lo lut tur chu an kawngah ka ke pahnih hian ka lo chep thin a. A tawpah kan miss lo lut chu hmu lawk thei hek lo le, miss chu a kawngah ka lo chep leh chat mai chu, a period chhung zawng dawhkanah min dintir char char.

3. Remthanga Pachuau
High School kal laiin ka kain ka vawih der a, ka vawih tak tak emaw an ti a, an rawn hawi phei thup mai chu, vawih tak tak lo mah ila ka lai ve khawp mai. Ka sen vek an ti.

4. Lalhminga Hmar
JL HSS-a ka kal lai khan Miss Rinpuii hian biology subject a la thin a, homework min pe a, ka thiam ve lutuk chuan min zawt se ka ti tawh khawp mai a. Roll call zawh chuan, “Homework ka zawt dawn che u a nia, inring r’u le,” a tih chu ka lo hre sual pek a, ‘ding ru le’ a ti emaw ka tia, rang fahranin ka ding vei zuk a, tumah an ding si lo, keimah chiahin ka ding ringawt. Miss chuan, “Hminga eng nge?” a tia, “ihh ih” Sawi tur a vang asin aw. Min nuih dur dur a, miss pawh a nui tawp.

5. Vavai Khiangte
Hman zanah kan monuin ramhuai chungchang vawi khat min hrilh a, chutih lai tak chuan kawngka an lo kik a, “Lo lut rawh,” ka lo tia. Ani chuan a lo hre lo pek a, kawngka inkalh a niang ka tia, ka va en a, a lo inkalh si lo va. Ramhuai emaw ka tia, na tawkin ka nam a, ka tlanchhe daih a. Kan inlengpa chu pawnah a ri bawp bawp a, kawngkaah a lo dak a, a lo hawi vual vual a, a haw leh daih. Ka zak asin aw… (He post hi vawi 1041 keu hawn a ni tawh e.)

-Brandon Burrows Hrahsel

Tun tum chu naupang tê la ni mah ila ka naupan lehzual laia ka chetchhiatna ka la hriat ve chhun chhun te ka rawn puang e.

1. BUY NEW BOOK: Hmaaannn….ah daih tawh ka piana hnu lama school ka kal tan tirhna hmasa ber kha ka la hre reng mai! English medium-ah kan lut a, kan principal Miss Sytoki ngei mai khan saptawng nalh telh tawlh tak mai khan “buy new book” a tih lai kha chiang takin ka la hria. Mahse, saptawng ka hriat vawi khatna a ni a, eng nge ‘buy new book’ awmzia pawh ka la hre lo hrim hrim. Kan ban hnuah ka pi nen dawrah ‘buy new book’ kan han zawng tak tak mai a nih kha. A va vang tak em! Tun hnua ka ngaihtuah leh khan khatih hun lai kha ka ngai e..

2. SAWI ZAUNA: Pawl thum ka nih lai hian kan Mizo teacher (Sir Rama kha ni tain ka hria, a hmel pawh ka hre chiang tawh lo, tunah eng nge a tih zel? A thi tawh nge a la dam pawh ka hre tawh lo. Mahse, kawrdum a ha thin tih chu ka la hria hehe) khan “tui tangkaina hi i thiam dan danin han sawi zau teh” a ti a, kei pawl thum naupang lek kha chuan sawi zau vak ngaihna kha ka la hre lo khawp mai. Ka ngawih vang vang hnuah “tui vengthlang field tiat” ka’n ti ve thuai mai a nih kha. Sawi zau tha tak chu ka ni. Tun ang hunah te chuan MLTP Act thlahdul thatna leh that lohna te kan sawi zuah zuah thei tawh sia, pawl thum naupang ka nih lai kha ka lo va hlat tawh tak em! (ve khanglang chuan hahaha)

3. INKHUALTELEM: Hemi tum hi chu naupang harh pangngai dan pela ka harh tum kha a ni ve chiang alawm. Kum 8 vel chu ka ni tawh ang, ka thianpa tun thlenga ka la kawm leh ka thian tha tak Sangsanga nen hian hmeichheho inkhualtelemnaah kan tel ve alawm. A then dawr nghak te, a then nu, a then an fanu etc.. tih vel khan an inthenhrang diat diat a, Sangsanga nen chuan lu kan meh zawh hlim a nih vang nge ni, lumettuah kan inruat ta tlat alawm mawle. Ka nu puanthui bakcheh ka va la chhuak a, duh duh lam hawi zawnga hmeichheho sam kan inmeh chhawk zak zak tum kha chuan an nu leh pateho khan min va hau nasa tak em aw! Harhah pawh a chintawk a awm tia ka pa Sena min zilhna kha ka la hre reng mai. Tunah te chuan an in hi kan meizial zuk rukna hmun a ni leh der tawh mai sia, kan lo va upa chak em! An fanu sam ka mehsak leh tho dawn mawni le hehe.

4. PATHIAN THILSIAM: Khami hun lai khan pawl engzat chiah nge ka nih ka hre chhuak zo ta lo. Mahse, mipa naupang te tak, school uniform kamis var leh kekawr hring ha leh necktie a hring leh a enga tial, elastic-a a nghawnga vehkual ka awrh tih chu ka hria. School tan hmain pawl 7 ho classroom-ah devotion kan nei a, kan Sir Tlana ngei mai khan min dintirin “Pathian thilsiam i hriat pakhat han sawi teh” a tia, “ka hre lo” tiin ka chhang. “Pawnah sawn va chhuak teh” (ka va chhuak a). “Eng nge i hmuh?” ka hawi kual vak vak a, “engmah ka hmu lo.” Keini aia rual u deuhho kha chu an nui dar dar. B.A. ka zir hnua ka ngaihtuah let leh hian kan uteho lo nuih dar dar nachhan kha ka hre ve chauh.

5. LALPAT(R)EKA: Hmana film lar tak ni thin Beastmaster..tiang bawk neia kan tih thin (ka rualpui thenkhatte chuan an hre ve lo mai thei, ka la naupang lutuk a, mahse, kei chuan ka chhinchhiah fuh ve em a ni) kha ka U Chhuana khan Lalpateka a ti mai zel thin sia, a hming tak tak emaw ka lo ti pek alawm maw le. Primary department kan nih laiin a nia, kan sunday school zirtirtu (ka pa ngei) khan “tunge in ngaihsan ber le?” tiin naupangho min zawt a, a hnung ber atangin ring lenglawngin “Lalpatreka” ka’n ti mai kha chu naupang te e ti lo khan vitamin ka pe tha hlawm khawp mai. Kha thil vang khan tun thleng hian Lalpatek tia min kotu pawh an la awm. (He post hi vawi 282 keu hawn a ni tawh e.)